Tampòn vaccino e ätar brügal

(Al sürbì ad Nadäl)

Me am ricord che a Nadäl,

un bell pranz l'era nurmäl.

Ansöin sarcäva un ducümeint

e tütt i'eran bei cunteint.

Dess inveci, sì! Dabbon,

pr'andä a sed ag vö al tampòn.                     

Ché, par tastä di bon anvein,

al vaccino al va pö bein.

(Ill du dos, co'in pö la zonta,

igh fann glëtt a la varianta)

Dess al cög, sta gram inzgnass

al ta guärda st'è un po' grass,

al mzura freva, colesterolo,

e in sal brass sa gh'è al vaiolo.

Da ché un po' g'vurà al nudär

par fä un pranz, dsùm, regulär.

Un garant par cunfermä,

s'è tütt a post e registrä.

Par la polio, la diftérica,

la pertuss e la tetanica.

Pr'al murbill, la parotite,

feina anca l'epatite ...

As pö mia dì cl'è dittatüra

ma ... spetta un po', una quäic'ura

e i fastidi bürucratich

i sarann pössé antipatich.

Me sum stüf da st'impidizi

e 'm sa cär mantegn i vizi.

Mang' a cà, csé va a finì,

ac fag ancura un bell sürbì.