Poesie piacentine: “Piaseinsa"

Con questo componimento, il poeta piacentino Valente Faustini canta l'amore per la propria terra: un sentimento profondo e smisurato.

Me son nassì in sal sass dla me Piaseinza  
e son vegn sö cme i fiur di nostar prä.  
A son muntà in duv Trebbia a la cumeinza
pò l'acqua feina in Po la m'ha purtä;  
ma dop Montzej am son taccà a la riva,  
s'andava un pö' là.. iama! muriva!

Me a sum 'l passarott insgazzarì  
c'al canta a gula averta in sla so turr,  
A son la povra levra ch'e ferì  
e 'l can e 'l so dulur i la fann curr:  
vöinla fa curr, l'atar al la fa lanzà  
e le.. la turna a mör duv la s'è 'lvà.

Me a sum cla grama lampda che a la sira  
la dindona dadnans a un mistadel:  
ghè una fiòla cla pregae cla suspira
e ghè un vecc in snuccion co' in man 'l cappell:  
i prim dulur e i' ùltim' in cumpagnia  
i van sò in ciel coi bott ad l'àimaria.

Me son la vuz dal nostar Campanon,  
c'la riva almà duv seinta un piasintein.  
Son la bandera russa, 'l gunfalon  
c'al sbarbatta in dal nos ciel asrein;  
me sum 'l stricc dal Rej: appena föra  
quattr' ascrullon, 'l bucca l'aria, e 'l möra.

E quand me sarò mort, purtem in Piassa;  
culghem dastes là in mezz ai Piasintein;  
ciamèm una batusa, una ragassa,  
con la sizura cla ma squàrza in sein;  
cl' am vera bein 'l cör e pò là sura  
cl'as pröva a digh: Piaseinza! 'L battrà 'ncura!

Fonte: PiacenzAntica